مسيرة الاخوان من شبرا

لا تعليق

فريدة 2

الحلقة السابقة: فريدة 1


 يهب الله كل عصر ما يميزه ويعطى الانسان من يدعمه، فمنحنا شبكات التواصل الاجتماعى ومنحنى صديقة فريدة، كما لعب Facebook دور هام فى ثورات الربيع العربى الكاملة منها والمجهضة ،لعب دور هام فى فتح آفاق عقل الجميلة، فمن خلاله بدأت ارسم شخصية فريدة فهى مؤمنة بالحرية الفردية فى حدود حرية المجتمع (ليبرالية) ،تظهر تعبيراتها ثقة بالنفس ،مثقفة،تملك من الطموح ما يكفى العالم. 

كنده علوش تقرب الشبه من فريدة

اتفقنا على المقابلة نهاية الاسبوع فى نفس المكان، مر الاسبوع كأنه قرن، واليوم الخميس موعد لقاءنا ،اصل مبكرا عن الميعاد ،تـأتى فى موعدها بالضبط ..مما جعلنى اتعجب
*بسم الله ما شاء الله فى معادك بالضبط ايه الدقة دى
تبتسم وتزيح نظارتها الشمسية الى وسط شعرها_الحريرى المظهر_ وترد


#انا 5 دقائق وبوصل هنا... انا ساكنة هنا فى الزمالك فى شارع شجر الدر


انها من ساكنى الزمالك ..الحى الذى تعلمت فيه والذى اقضى فيه ما يقرب من ثلث عمرى.. وحين ذكرت شجر الدر قلت اعمل فيها المثقف


*شجر الدر.. كانت من اعظم الملكات قدرت تنقذ مصر وانقذتها من الصليبىين، كانت ست بميت راجل ،بس يا خسارة كانت تاريخ وخلص
#تقصد ايه تاريخ وخلص؟؟!
*اقصد ان خلاص مبقاش فيه شجر الدر..مبقاش فى ستات تقدر تحكم
#يعنى انت ضد حكم المرأة!
*مش ضده لكن ازاى ست تمسك جيش وتؤمر عساكر وتحارب وتلبس العريان وتتحكم فى رجالة بشنبات وكده


يظهر الغضب عليها وترد

شجر الدر

#لأ انت ضده بس انا هقولك شوية حاجات كده انا متأكدة انك متعرفهاش عن شجر الدر،زمان ايام ما كانت شجر الدر فى الحكم كان الشيوخ بيدعولها فى الصلاة "اللهم احفظ الجهة المستعصمية الصالحية ملكة المسلمين، عصمة الدنيا والدين، ذات الحجاب الجميل والستر الجليل، والدة المرحوم خليل" وكلمة الستر الجليل لان وقت الحرب مع الصليبيين كان طعام السلطان المتوفي يدخل إلي غرفته علي أن تعبان وتقوم هي مقامه في استقبال رجال الدولة من خلف ستار، وقدرت بتفكيرها تقود بلد فى حرب ضد جيوش، هزمت رجالة واسلحة فى وقت كان انهيار الدولة على المحك.

*فعلا مكنتش اعرف معلومة الدعاء دى بس بردوا ممكن تكون واحدة وخلاص

#كليوباترا بعد ما بطليموس الثانى عشر نفاها لسوريا قدرت ترجع بجيش وتتحالف مع القيصر واستطاعت تأخد حكم مصر وقدرت تقلل مديونية مصر عند روما ونظمت الضرائب واهتمت بالزراعة والري وحققت الرخاء والطمأنينة للبلاد وزادت من تجميل الإسكندرية وأعادت تكوين مكتبتها وشجعت العلماء والمشتغلين بالعلوم الكيماوية والرياضيات والفلاسفة ورعت فنون التصوير والنسيج وشجعت الصناعات المحلية ونقلت مصر نقلة عظيمة وغير كليوباترا فى حتشبسوت ونفرتارى وغيرهم فى التاريخ وكانوا احسن من رجالة كتير بس اللى يقرأ التاريخ

اشعر بالخجل امامها، فهى مثل الام التى تعاقب ابنها ،اعطتنى درسا لم انساه وليتها توقفت لكنها استمرت فى رد ما اعتقدت انه اهانة لبنات حواء واستكملت

من اليمين: صفية زغلول- هدى شعراوى

# وفى ستات كتير اثروا فى تاريخ مصر زى ملك حفنى ناصف (باحثة البادية) قاومت الاستعمار الانجليزى وزيها صفية زغلول وهدى شعراوى وقبل الثورة الستات كان ليها اثر عظيم زى بثينة كامل وانجى حمدى واسماء محفوظ واسراء عبدالفتاح و وداد الدمرداش وغيرهم كتير جدا ..ثم تعود لابتسامة تدل على النصر وتعكس ثقة بلا حدود فى امكانيتها

وداد الدمرداش.. عاملة نسيج بمصانع مصر للغزل والنسيج بالمحلة، اختارتها مجلة نيوز ويك الأمريكية ضمن أشجع 150 سيدة على مستوى العالم نتيجة لدورها منذ اضراب المحلة 2008 

لقد هزمتنى وجعلتنى اصمت للابد، هزمتنى الجميلة لانها مؤمنة بحقوقها ومُصرة على انتزاعها من مجتمع يجهض حلمها، رغم انها هزمتنى ولا هزيمة الدنمارك امام هتلر، كنت اتمنى ان استطيع ان انحنى امامها لاقبل يدها ،فهى حقا فريدة فهى مثل قطرات ال ندى على اوراق الشجر لكن لايمنع من الرغبة فى الانتصار عليها، فريدة عظيمة.

لمتابعة الحلقات القادمة يمكنك الاشترك فى المدونة اذا كنت تملك حساب على blogspot او يمكن المتابعة عبر email ليصلك جديد المدونة او تتابع حسابى فى شبكات التواصل الاجتماعى.
انتظر تعليقاتكم... لطفا انشرها :)


ذات صلة::

• عن سميرة ومنى ونوارة وغادة وعزة وصفا وغيرهن

فريدة 1

ساقية الصاوى-بستان النيل

  غروب الشمس اوشك على الحضور ،اذهب الى ساقية الصاوى حيث اعتدت ان اقرأ على النيل،حالتى النفسية ليست على مايرام وابحث بين الثنايا على حب ينير حياتى من جديد ويعوض لى آلم الماضى الحزين.

  ادخل قاعة البستان حيث الجلوس على النيل، المكان مزدحم للغاية ومكانى المفضل لا يوجد به فراغ الا بجوار فتاة رائعة الجمال، ممشوقة القوام، تميل الى الطول ،تكشف الرياح جمالها حين تحرك شعرها ،المشهد يذكرنى بافلام هوليود الشرق الرومانسية فأنا اراه حقيقة امام عينى، اطلب من الله ان يجعل تلك الفتاه صديقتى فكم انار وجها الجميل قلبى واثلج صدرى، اذهب بتوتر لاطلب منها الجلوس بجانبها 

*سلام عليكوا.. ممكن ازعجك واقعد جنبك لان زى ما حضرتك شايفه مفيش مكان فاضى.. 

ردت عليا بابتسامة رائعة.. #طبعا اتفضل

اشعر بالاضطراب ،هى تتزحزح قليلا وتنزل ارجلها من فوق بعضهما وتمبيلهم على الارض بزاوية 60 ، اخرج كتابى ،كتاب "الحوار العلمانى الاسلامى" لمؤرخ طارق البشرى ، تمر دقائق باذا بالجميلة تقطع قرأتى

#sorry ممكن اشوف الكتاب

فريدة تقرب الشبه ل كنده علوش

*بالتأكيد

تمر بين صفحات الكتاب وتتعمق فى قرأءة احدى الصفحات اقاطعها

*الكتاب موجود فى مكتبة الشروق اللى فى حسن صبرى 

تشعر بالإحراج وتغلق الكتاب.. وكعادتى _المنيلة_ اركز فيما قلت بعد ان انطق بيه فاحاول ان اعدل الوضع

*انا قصدى لو تحبى تشتريه علشان شايفك مهتمة بيه.. ادركت انى _زدت الطين بلة_

تعيد الكتاب لى لكن بسؤال 

#هو انت اخوان ولا سلفيين؟

*ولا ده ولا ده

#طب انت علمانى؟

*بردوا لا

تزداد حيرتها وتعدل من جلستها 

#طب بتقرأ ليه كتاب عن العلمانية والاسلامية؟!!

اشعر بالحرج فأنا لا اتحدث مع اشخاص لا اعرف هويتهم وخلفيتهم ومما يزيد احراجى انى لا اعرف هل هى مسلمة او مسيحية !ليس لشيىء الا تحديد طريقة الكلام ففى بلادنا العزيزة اصبح الحجاب جزء من زى الفتيات منذ ان تدخل المرحلة الاعدادية نتيجة لضغوط المجتمع، وبالطبع هذه الفتاة تجاوزت تلك المراحل بكثير وهى غير محجبة.. قررت ان اتحدث فى القشور دون الدخول فى التفاصيل

*مبدائيا الفترة دى لازم الواحد يقرأ فيها عن كل المواضيع دى علشان ميكونش طرطور بين الناس ويقدر يفرق بين الصادق والكداب،ومحدش يضحك عليه باسم الدين او يخوفه بردوا من الدين وبالنسبة لايدلوجيتى فانا مؤمن بالليبرالية لكنى مش علمانى

تقاطعنى #ازاى ليبرالى ومش علمانى!!

*يعنى ان مؤمن بحرية الفرد فى حدود حرية المجتمع اللى هى اكيد حدود الدين مؤمن ان محدش يستغل الدين فى الدعايا السياسية وبردوا مؤمن انه من حقه يحط برنامج حزب من خلال رؤيته للدين لكن ميقولش ان ده هو الدين بس ،فى كتاب ل د/محمد عمارة اسمه "تيارات الفكر الاسلامى" ذكر فى نهايته ان فى 197 فكر اسلامى وذكرهم وذكر اهم ما يميزهم فمينعش واحد يجى يقولى ان ده هو الدين وبس، انتى عارفه فى كتب الشيخ الغزالى تقريبا كل 10 صفحات لازم يكتب حاجة عن الحرية المطلقة وان الانسان ايمانه بيكتمل فى الحرية المطلقة، هو طبعا مش قصده اننا نبقى مجتمع فوضوى ويقصد ان المؤمن الحقيقى مش محتاج حد يكون رقيب عليه لان ضميره وعقل هم اللى هيكونوا مراقبينه ..دى الليبرالية فى نظرى لكن انى افصل تمام بين الدين والدولة شىء مش من سمات المجتمع المصرى

#ماهو اللى انت قولته هى العلمانية!!

*العلمانية ليها تعريفات كتير لكن انا ببعد خالص عن المصطلح علشان كل واحد بيفهمه بمزاجه ومدرك ان فى ناس شايفه العلمانية زى اللى انا قلته لكن فى ناس بتعرفها بتعريفات تانية فبحب ابعد عن الاسلاك الشائكة

#انا موافقك فى انت قولته اصل كل واحد ليه تفسيره فى الدين ومش من حقه انه يفرضه عليا انا حرة فى اللى شايفها، ربنا حيحاسبنى انا مش حيحاسبه هو ،المشكلة فى الناس اللى مفكره نفسها فاهمة فى الدين ولما تسأله يقول هما اللى قالولى ،طب انت عقلك فين،والمصيبة فى اللى يقول انت مفيش تفكير فى الدين، طب ربنا مديك العقل ليه

اشعر بعظمة من أمامى واشعر بارتياح شديد لهذه الفتاه لا أعلم لماذا،اعود لقراءة كتابى قبل ان اعود تقاطعنى لنتبادل الأسماء وطرق التواصل الالكترونى ،كنت اتمنى ان افعل ذلك منذ جلست بحضرتها فأنا فاشل بدرجة امتياز فى تكوين العلاقات الاجتماعية وانتظر دائما الآخرين ليكونوها..

اسمها فريدة... حقا انه اسم على مسمى فهى فريدة الجمال وفريدة العقل

وبدأت العلاقة من ال facebook :)

لمتابعة الحلقات القادمة يمكنك الاشترك فى المدونة اذا كنت تملك حساب على blogspot او يمكن المتابعة عبر email ليصلك جديد المدونة او تتابع حسابى فى شبكات التواصل الاجتماعى.
انتظر تعليقاتكم... لطفا انشرها :)