أزمة وطن وأزمة شعب وأزمتى

الحقيقة احتارت فى عنوان التدوينة لانى فى البداية كنت كاتبها عن مواقف حصلتلى وبعد كده لاقيت نفسى بكتب عن سواقيين الميكروباص

موقف شخصى

الاسبوع ده كنت مانع نفسى من الفلوس وكان معايا من يوم السبت تقريا 15 جنيه بس ..حقيقة الامر عرفت يعنى ايه تبقى عايز حاجة ومش قادر تشتريها خصوصا لما الفلوس خلصت يوم الثلاثاء ومكنش معايا غير فلوس على قد مواصلاتى 125 قرش(ميكروباص ب 75قرش وتانى ب 50 قرش) ولو كان السواق قال ان الاجرة جنيه كنت هكمل لحد البيت ماشى واتعرضت لموقف محرج لما طلعت الميكروباص ولاقيت زميل و مكنش معايا فلوس ادفع لزميلى كنوع من الاعتياد مرة عليا ومرة عليه 

كل ده حصلى بمزاجى انا اللى مانع الفلوس عن نفسى وبمزاجى مش باجبار من حد ولا اجبار ظروف

السؤال هنا كام واحد معهوش فلوس ومش بمزاجه وكام واحد مش لاقى يركب مواصلات وكام واحد مش لاقى يأكل عيلته؟!! 

كام واحد يا مصر

من الموقف الشخصى

بالاضافة لكل اللى فات فى طبقة مش حاسيين بيها طبقة سائقى الميكروباص

على لسان اتنين من سواقيين الميكروباص انهم كانوا بيجيبوا صفيحة الجاز (20لتر) كانت ب 22.5 جنيه وبسبب ازمة البنزين والسولار (الجاز) بقوا ياخدوها ب 40 و 50 جنيه "واذا كان عاجبك عاجبك مش عاجبك اركن عربييتك" هكهذا قال السائق ويستمر فى السرد  ان غير ان الجاز بضعف التمن مشكلة الكارتة اللى لازم يدفعها وغرامات المرور ومشكلتها اللى لسه متحلتش ..السبب فى ان السواقيين بتحكى انجزء منهم غل الاجرة من 75 قرش الى 1 جنيه وشعب الميكروباصات كان غير راضى عن زيادة ربع جنيه .. الازمة فى دايرة الشعب غلبان ومعهوش فلوس والسواقيين العيشة صعبة عليهم والعصابة لسه بتحكم

الحقيقة اكتشفت ان البلد فيها بركان بيغلى وبيغلى جامد وهينفجر قريب ويوم ما ينفجر هيعور الكل

افيقوا يرحمكم الله

ذات صلة:

الثورة القادمة لمن؟!